近年响香港經常有野豬出沒，最近更有警員被野豬襲擊受傷，之後漁農及自然護理署就因為捉野豬去人道毁滅而引起爭議。有人就話野豬為患呢個方法治標又治本，又有人話呢個方法殘忍同剝奪野豬生存自由。

睇返資料，原來野豬係1500萬年前已廣泛分佈於亞歐非大陸各地區。而响古代中國，野豬呢種生物都一直存在，講到野豬，可能會有史友諗起唐太宗李世民。响《大唐新語》中就有一段李世民打獵嘅故事：「太宗射猛獸於苑內，有群豕突出林中，太宗引弓射之，四發殪四豕。」而當中嘅「豕」就係野豬。

至於响古代中國民間社會仲有「一豬二熊三老虎」呢種講法，即係話兇猛野獸排行榜當中，「豬」排頭位，熊同老虎都要排佢哋後面，而呢個「豬」就係指野豬喇！據講呢個排名並唔係計佢哋嘅戰鬥力，而係指佢哋對人類帶嚟嘅危險程度。老虎同熊其實响古代中國境內，活動範圍唔算太大，而野豬活動範圍遍佈大江南北各地，人類撞到野豬機會自然遠超熊同老虎。另外，野豬係群居動物，戰力亦唔低，經常响人類活動範圍出現，自然為古代人帶嚟破壞同威脅。